דניאל_-215

SELIM SALTI ESKRIVE I AVLA EN LADINO

El Djudeo-Espanyol, konosido mas komo “Ladino” es la lingua de los Djudios ke fueron ekspulsados de Espanya, en 1492, i ke se aresentaron en el Imperio Otomano, en el Norte de Afrika i mas tadre en la Evropa Oksidentala i los Estados Unidos.

Durante sienes de anyos, los Sefaradis mentuvieron la lingua Espanyola, todo en mesklandola kon palavras i lokusiones de otras linguas i kulturas, ke djuntos kon el Ebreo krearon una lingua Djudia espesiala, rika i diferente en kreasiones literiarias.

El Ladino – lingua de jenerasiones i lingua para jenerasiones.

DSC07223

UN REKORDO DE MI CHIKES

UN REKORDO DE MI CHIKES

Por el Dr. Selim Salti

En el anyo 1942 ayedado de 7 anyos mi padre me avia yevado a Edirne sivdad turka ke tiene frontiera kon la Gresya i la Bulgariya.  En paseando al bodre de la Maritsa el rio ke esparte la Gresya de la Turkiya vimos de lechos en el lado grego soldados kon uniformas de kolor maron.  Mi padre sovre esto me avia dicho ke estos eran soldados alemanes ke okupavan la Gresya.

La verdad es, ke todo en oyendo kada dia en mi kaza lo ke se estava pasando en Evropa sovre la Segunda Gerra Mondiala no me rendi kuento kualo mi padre me keriyia dar a entender en yevandome al bodre del rio.

Una semana antes del viaje en muestra kaza en Estambol mi madre ke era nasida en Edirne me avia dicho ke seriya bien de vijitar la sivdad onde se engrandesyo para ke me ambeze mas sovre su famiya Bennun i ke sus primos i sus famiyas tengan la okazyon de konoserme.  Esta idea me avia plazido muncho i es ansi ke estava tresalido de viajar kon mi padre un dia de viernes de Estambol a Edirne en el mes de Avril.

En kamino komo siempre el uzava, el me konto sovre su chikes i su  manseves, sovre todo de sus estudyos  en eskolas alemanas en Estambol i en Alemanya.  El fue ijo regalado ke no tuvo el mazal de konoser a su padre el kual avia disparisido kuando el teniya un anyo lo ke aklara la razón por la kuala lo yamavan Marko al lugar de Hayim Vitali.  En akeya epoka para guadrar un guerfano de ora mala se uzava aperfijarlo i ajustar a su nombre el nombre de Marko.

Ademas no me akodro kuantena ves era, me konto sovre su servisyo militar durante la Primera Gerra Mondiala en la kuala fue uno de los primeros soldados otomanos vistidos de blu, kolor ke reprezentava la aviasyon de akel tiempo.  Siendo tresladador del Marechal Bronsart von Schellendorf el se topo en Çanakkale (Dardanelles) durante el konflikto i se suvyo munchas vezes en balones dirijivles de la armada almana. Sovre todo el me konto el espanto ke tuvo la primera ves de estar en la kabina del balón , dia ke uvo un ayre fuerte ke los meneyo  komo una pluma.

Anyos pasando después de mi barmitzva   entendí la razón por la kuala este ombre tan entravado i seryo me yevo a Edirne.   El ya avia vizyonado de muncho mas antes las intisyones de los nazistos de matar a los djudyos.  Marko Vitali Salti durante su manseves fue un ombre de disiplina, de kultura, amator de muzika klasika (tanyiva violín), i laboryozo. Su mas grande trajedia fue la Shoa en la kuala peryo todas sus relasyones i amigos en Almanya en despartes de la peryita de primos ermanos i de sus famiyas de la parte de mi madre ke bivian en Salonik.

Kuando pregunti a mis paryentes la razón por la kuala vijiti Edirne kon mi padre, la repuesta fue kurta i klara.  Rekonoser los soldados almanos para ke sean markados en mi memoria.  Por ke el grande espanto ke teniyan en akea epoka era ke kada dia se aspera una envazyon nazista en Turkia, por ke el buto de Hitler era de konkuistar los pozos de petrol de los Kafkases, dunke o pasar por la Turkiya o atakar la Rusia.

Kuando la novela vino ke la Almanya deklaro la gerra a la Rusia los djudyos de la Turkia tomaron un grande reflo de kontentes por ke esto keriya dizir la salvasyon de 80.000 djudyos turkanos de ser kemados por los nazistos. Mi padre, me kontaron, a la novela se metyo a baylar koza ke no se asperava de el.

Enfin, el me dyo a entender ke si los Almanes ivan a entrar i okupar la Turkia uno de los primeros ke ivan a matar entre los djudyos iva ser el, visto ke el era bien konosido por los almanes biviendo en Estambol kon los kualos tuvo relasyones amikalas i profesyonalas antes la gerra. Ademas ajusto ke en kavzo de envazyon me ivan a mandar de vista a la sivdad de Samsun, sivdad al bodre de la mar Preta, ande un serkano amigo muzulmano de muestra famiya, para ke sovrebiva i testigue de lo ke eventualmente afitara a mozotros djudyos.  Es ansi ke entendí por ke durante anyos yevi en mi pecho  komo un sutyen una bolsa kuzida en kaza, onde sin saverlo avia miles de liras, paras ke devria servir para mi egzistensya en Samsun sin ser a la karga de los balabayes.

Ansi rengrasyo al Todo Polerozo ke no uvo menester te todas  estas prekosyones.

Flag of Israel

ISRAEL MIRAKOLO SIN SEMEJANSA

Dezde su fundasyon ay 75 anyos Israel no tuvo deltodo repozo kon sus vizinos, ma malgrado esto supo sovrebivir grasyas a la unyon del puevlo djudyo i de la asistensya moral i material de los Estados Unidos. Durante esta perioda milyones de djudyos retornaron a la tyerra de sus padres i kon grande determinasyon fraguaron un payis demokratiko, fertilo, militarmente fuerte, a la punta de la teknolojia del dia de oy, ke se izo lugar de vida oroza para la mayoriya de sus sivdadinos inkluzo las minoridades muzulmanas, kristyanas i mas. Mizmo el 20 por sien de la povlasyon ke se deklara povre es mas rika de munchos puevlos biviendo en la Afrika i en la Asya. En poko palavras Israel es un mirakolo sin semejansa en este mundo.

En los diyas pasados komemorimos los 6 milyones de djudyos ke fueron masakrados por los alemanes nazistos i sus kollaboradores evropeos. Kuantos de eyos se podiyan imaginar en el kamino de la muerte ke en 2023 el puevlo djudyo selebrera los 75 anyos de la egzistensya de Israel, payis independiente djudyo rekonosido por las nasyones del mundo. Kuantos de entre eyos ke se podyeron salvarsen i ke dainda biven kon mozotros se podían kreer de ver i fiestar este diya.

Es triste de sentir de la boka de los antisemitos ke los djudyos israelianos komo los de la diaspora se azen mas mal de si parasi ke del akeyo de los inimigos terroristos ke miran de derokar el uniko payis djudyo del mundo. Eyos pretenden mizmo ke Israel no va egzistir mas de 80 anyos, visto ke la istorya mos ambeza ke la endependesya de los estados djudyos no depasaron este tiempo.

En los dalkavos mezes, en Israel, los diferentes ke aparesyeron entre la povlayon sovre la independensya del sistema legal i de la manera de eskojer los cuzgadores la diviza en dos kampos ke se akaran danjorozamente. Kuando un puevlo esta arimado a la pared por sus inimigos, tal komo Israel, no será djusto de peleyarse por sujetos internos ke se poden kon pasensya i voluntad atakanar kon el tiempo, en topando kompromizos. No kale dar la oportunidad a los inimigos nombrozos de atakar Israel en pensando ke se esta aflakando en peryendo su ideal de ser una nasyon unida. Ademas difisil de no pensar ke las futuras jenerasyones no van a fiestar el sentenaryo de Israel, payis progresisto ke se engrandesera mas i ken save, será uno de los mijores de la egzistensya umana.

En fiestando kon alegría el dia de independensya fuimos todos los djudyos konsientes ke Israel bivira no solo por ke es i será un payis adelantado o por ke muestra rasa, muestra relijyon es diferente, ma porke somos ermanos de una sola i mizma famiya. Puede aver divizyones entre ermanos, pletos i aravyas, ma egziste en mizmo tiempo kerensya, amor i sensyo de responsabilidad de parte de kada uno de mozotros. Devemos ser unidos para reushir los 75 anyos vinideros. Kada diya ke pasara despues de este aniversaryo mos trayera mas muncho azlaha kuando pensamos ke del punto de vista enerjiya Israel es independiente, su adelantamiento en el domenyo de la teknoliya avansa a grandes pasos i el fakto ke el GDP per kapita es mas alto de 50.000 dolares. Vos akodrare ke este mizmo shifro era de 21.000 dolares en el anyo 2000, i de 2.000 dolares solo en 1970.

Mos demandamos kon razon, despues de este diya gloriozo komo reglar los problemes importantes de muestro payis. La kestyon palestiniana es i será la mas importante de eyas. Se kere kon pasensya kontinuar a azer todos los esforsos demenesterozos para konvinsir el mundo muzulmano sunnito komo shiito ke estamos prontos para una pas justa kon los palestinianos si eyos achetan Israel i ke entendyen ke dinguna fanteziya militar no los ayudara a echar los djudyos a la mar. Sovre el sujeto de solusyonar este problema ay ken propozan la separasyon de la tyerra en 2 estados, otros una administrasyon kantonala dekalkada sovre el rejimen suisso ke dura dezde siglos, ken avla de krear una federasyon entre los territoryos onde bive la pozlasyon araba de Yehuda i Shomron kon la Jordania i mas. El governo aktual devra dunke lavorar sovre dos kampos, retablisir la pas en el payis entre los laikos i relijiozos en la kestyon judisyarya i okuparse seryozamente para dezvelopar remedyos por la kestyon palestiniana.

Enfin miraremos a ver grande en muestro futuro, este payis es una “success story”, devemos mizmo en momentos de apreto realizar lo ke se parvino a azer en este payis es immensyo i ser orgoyozo de El.

DSC07225

MI ALIYA

MI ALIYA
Por el Dr. Selim Salti -2019-
En la istoria moderna de Israel kada uno de mozotros ke izimos aliya (suvir) a Israel tenemos muestra propria eksplikasyon del akto de vinir estableserse en las tyerras de muestros antepasados. Ken konta para salvarse del antisemitizmo relijiozo, ken del antisemitizmo nasyonal, sovre todo del nazizmo, ken de los pogromes de Rusia, ken de la inimista del kristianizmo o del islamizmo i mas i mas. Ma ay otros ke kontan ke vinieron para bivir en una sosieta libera i ansi fraguar de muevo una patria para los djudios dispersados en las kuatro puntas del mundo; para arekojerlos debasho la mizma bandiera de Sion . Es esto ke yamamos el sionizmo, ideolojia nasyonalista tanto importante para mozotros.
De la edad de 14 anyos estuve en kontakto kon el sionizmo en Estambol sivdad en la kuala nasi. La organizasyon Betar ke era klandestina en akea epoka en Turkia me formo a ser un djudyo no komo mis parientes ke no tuvieron kontakto kon el revizyonizmo ke mos enkulko a ser orgolyozos de muestra apartenensia a la nasyon djudia. Eyos se ambezaron a ser kayados i no mesklarse de politika en kel kual djenero. No pensavan mizmo ke eran konsiderados durante la perioda de la administrasyon diktatoriala de la republika fondada por Ataturk en 1923 sitadinos de segunda kategoria, ke no les era permetido de egzijir sus derechos sosyales ke la konstitusyon dava a todo sivdadino del payis. Esto fue una erensya triste ke me marko por la vida.
Anyos pasando la mayoriya de mis amigos i kolegas kon los kualos lavori mano kon mano, aziendo muestro dover para la formasyon de las jenerasyones mas mansevas i aparejarlas para ke un dia agan sus aliya, me ayudo a sobrebivir en un atmosfera amofinada a kontinuar mi vida en Turkiya ma lo ke me permetyo ademas a dezvelopar industrias petrokemikalas las kualas dieron a sientos de personas lavoro i pan siguro.
Malgrado mi reuchita ekonomika, mis estudyos, mi saverisyo i mi ekspertiva profesyonal, ke me ayudaron a enrikeserme materyalmente, a la edad de 40 anyos no me sentiva mas pueder bivir en Estambol. Mi deredor profesional no topava justo a ke parte i abandone mis sosietas endustrialas, eyos pensavan ke mi partensya no era un akto muy entelijente. Ma mi desizion de irme era irrevokavle.
Lo mas duro era ke la mayoriya de mis amigos de chikes , sus diplomas en la aldikera se fueron a Israel dechandomos un punyado de amigos biviendo si se puede deskrivir, solikos en muestro ‘getto amikavle’. Ansi no me sentiya mas del todo motivado a bivir en Turkia.
En `1975 en una semana tomi la buelta i me fui a la Evropa a bivir en el prensipyo en Bruxelles i mas despues en la Suissa italiana, en la kuala enjuntos kon mi ermano grande establisimos una sosieta de korreteria de materia- primeras de fibras sintetikas . En 1985 me transferi a Genevra i resivi la nasyonalitad suissa. Esta ves me sinti mas asolado todo integrandome a la komunidad djudia de la sivdad en la kuala fui mizmo un dirijente aktivo.
Durante este periodo mi kontakto kon Israel se dezvelopo bastantemente. Todos los 3 mezes vijitava el payis i sovre todo despues ke el partido Herut enkavesado por Begin ampeso a ganar las eleksyones mis sejornos se alargaron por semanas.
En 1980 sovre la demanda de los dirijentes politikos de la epoka, desidi de investisir en Israel, a mi manera de provar mi kerensya enverso la Medina i ke pensi ke sera un akto konkreto de mi sionizmo. Ansi fondi kon un amigo la kadena de supermerkados “Metro “i di lavoro a sientos de israeliano, onde una grande partida eran de orijin turka. Ademas en la mizma anyada fondi la “Fundasyon Yeushua Salti “ para ayudar kon bekas a mansevos universitaryos de orijin sefarad. Esta institusion dezde 1983 tiene miles de alumnis la mayoriya de desendiensa sefarad turka.
En 2003 al seno de la Universitad Bar Ilan establisi un sentro de estudyos akademikos para la lingua i su kultura de los sefarades ladino avlantes. Es ansi ke el ladino es estudyado en profondita i sientos de estudiantes se ambezan no solo la lingua ma investigan en la kultura sefarad. Visto ke el sentro Salti fue una grande reuchita el anyo pasado eya fue egrandesida en Instituto. Fina oy el Instituto Salti formo 14 doktores i otanto de maestros, koza unika en Israel i mizmo en el mundo. El instituto tiene una de las mas grandes bibliotekas de libros en ladino kaji 5000 volumes, 400 manuskritos i livros istorikos, lo mas regalados por djudios sefarad biviendo en Israel i en otros payizes del mundo. Bien entendido a esto se adjustan dokumentos istorikos, koleksyones de gazetas en ladino i mas.
En la anyada 1991 sali en pensia i likidi todo lo ke tenia en Turkia , Suissa i en otros payizes para vinir, mizmo un poko tadre , a bivir en Israel. La razon prinsipala era de realizar mi eshuenyo de chikes i de bivir entornado de mis ijos i mis inyetos en Eretz Israel. No fue fasil, sovre todo vos dire ke ambezar el ebreo no es koza livyana i si no nasites en el payis a mi perspektiva personal nunka lo pratikaras sin yerros. En turko se dize-‘ mizmo la ija del kadi (djuzgador) tiene defektos-‘ ,komo eya i yo no so perfekto, esto ke seya mi defekto!
Me siento orozo de bivir en un moshav i en mi propria kaza, kontinuando a azer benfezensia i okupandome de la Itahdut Yotsei Turkia. Amorozo de Israel, me enkanto de ver este chiko payis komo adelanta i se enfortese grasias al saverisyo de la djuderia moderna aktual, fenomeno ke mis nonos no se lo sonyavan. Mi jenerasyon fue mazaloza de alkansar a ver el briyo de la sosieta Israeliana ke mira de adelantarsa kada dia mas.
No ay duvda el puevlo de Israel deve dainda muncho penar para tener cuntos kon sus laikos i relijiozos una sosieta justa i prospera i ken save un dia pueder azer pas kon los vizinos arabos.
Parami valyo la pena de azer mi aliya mizmo a una edad avansada!

selim moni hayim bar ilan 2013

SOVRE LA MUJER SEFARAD

SOVRE LA MUJER SEFARAD

Por el Dr. Selim Salti   Julio 2020

Anyos antes en un kolokyo en la Universidad Kroata de Dubrovnik (Ragusa) avia dado mi sentimiento sovre la emansipasyon de la mujer sefarad i avia dicho:

“ Durante uno de los seminaryos del Sentro Salti (aktualmente el Instituto Salti)  se avlo de la mujer djudia  en jeneral i lo ke me entereso lo mas fue lo ke se disho de la mujer sefarad  dezde el  sieglo pasado fina  los diyas aktuales.  En muestro tiempo, la mujer sefarad  es akea ke konose su idioma,  ke tiene  abuelos ladino avlantes  de  orijin espanyola.   Por siguro,  se pensa ke su famiya es orijinarya del  Imperio Otomano, el solo lugar onde  el kastilyano antigo fue uzado durante sieglos .  La mayoriya de los djudios   sefaradis ke se establesieron afuera del Imperio Otomano kon el tiempo achakes de siertas ovligasyones perieron la uzansa de la lingua i de las kustumbres  por la simple razon ke eyos no fueron nunka achetados komo nasyon otonoma, lo ke fue el kavzo kontraryo  en tyerra turka. Ansina los djudios ke se establesieron en el Medyo Oriente i en los Balkanes tuvieron este mazal.  Si oy en dia una mujer avla el ladino , esto  kere dizir ke tiene o tuvo parientes  ke nasyeron i bivieron  en el Imperio Otomano  i ansi es konsiderada komo la verdareda sefarad.

Para dar mi sentido  sovre este sujeto, dishe:

La mujer djudia, en su forma  de madre i de espoza , es el elemento fondamental del nukleo familyal djudio. Las mujeres ke konosi  de serka  i intimamente , komo la mayoriya de  los ombres, son mi madre, mis ermanas i mi mujer. Mazalozas   fueron eyas ke no se engrandesyeron izoladas en los kurtijos de sus kazas, ambezandosen solo a gizar,a kuzir, a brodar, a kantar i a oyir de sus madres siertos preseptos de la Tora.  Koza ke fue el kavzo de mis nonas i biznonas ke no supieron ni meldar ni eskrivir i ver banko de eskola.

Akeyas ke nasyeron en los dalkavos sien anyos fueron edukadas en eskolas  djudias o nasyonalas en el payis  en el kual bivieron o  biven.  De muestro tiempo eyas frekuentan universidades i se azen ekonomikamente independientes en lavorando en sus propyos  domenyos. La mujer sefarad de oy, no es solo la persona ke auna  la famiya, eya  mira  de meter kon imensa pasensya pas i ekilibro entre  sus ijos,  el orden en  su morada ,i se siente responsavle de su limpieza.  Ademas  aregla kon saverisyo todo lo ke se pasa al dorredor de su famiya i komo lo di a entender mas ariva, va mizmo a lavorar para ayudar ekonomikamente su matrimonyo. “

Kon la fondasyon del estado de Israel, kada manseva djudia  tiene el ovligo antes de kazarse de ser soldada i de partisipar a la defensa del payis.  Digo esto es una bendisyon , ke  permete a la mujer israeliana de tener el mizmo rango sosyal del ombre. Mas independiente eya  partisipa a la vida  moderna del  payis i se siente respektada  por la sosiedad sivil .  Leyes la proteja de abuzos i le da derechos de libertad en la sosiedad en la kuala bive , de poder tomar sus propyas desizyones sin demandar el konsentimiento de su espozo. Estas kondisyones, muestras abuelas no las bivieron i mizmo no se las sonyaron. En poko biervos la djudia moderna  es muncho mas dinamika de sus nonas i biznonas.   Ansina  la mujer sefarad en Israel se asemeja a la mujer de otras orijines  kon la sola diferensya  ke eya es mas respektuoza enfrente de los  miembros mayores de la famiya.

La emansipasyon de la mujer djudia en los 120 anyos pasados es  al nivel de la mujer del oksidente, no manko, sino mas.   Savemos ke munchas de eyas fueron muy famozas.. , me permeto de darvos unos kuantos nombres de la  elit sefarad ke bivyo en el sieglo pasado, komo Emma Lazarus  nasida en Los Estados Unidos, Rita Levi Moltancini nasida en Italia, Bat Ye’or nasida en Ayifto, Françoise Giroud nasida en Fransia,  Ester Morges Aligranti nasida en Turkia, Buena Sarfati nasida en Gresia, Camila Kolonomos nasida en Makedonya. Bien entendido la lista es larga,  no tengo aki la posibilidad de nomarlas a todas.

Enfin vos dire ke  me ambizi durante  el enkontro dichas ke uzavan muestras nonas, ke me paresen interesantes.  A saver:

PAN DE KAZA ENFASYA.

NI LA NOVYA NI LA SEMOLA NO LAS MIRES KON KANDELA.

SAKO VAZIYO NO SE APARA EN PIES.

POR UN POKO DE SAL NO MIRES LA KOMIDA A  MAL.

EN KAZA YENA PRESTO SE GIZA LA SENA.

NI SENA DE KARNE NI ESTAR KON LA ESHUEGRA.

DE KE PARI, BOKADO BUENO NO KOMI.

KRIAR ES FERRO MASHKAR.

DIZEREMOS BUENO KE SE AGA BUENO.

PAN I KEZO MA UN BUEN BEZO.”

DSC07134

PREOKUPASYONES DEL DIA

PREOKUPASYONES DEL DIA

Por el Dr. Selim Salti   2019

Muy pokos kedimos en Israel komo eskrivanos de ladino (judeo espanyol, judezmo, espanyol i mas, no me emporta komo yamash la lingua de muestros antepasados) i esto me aze pensar kon tristesa sovre el futuro de esta lingua. Eya reprezenta la baza del  sefaradizmo i de su kultura . Poko antes sovre el apoyo de la Akademia Espanyola, se miro de organizar una akademia semejante  chika en Israel debasho el patronaze de la Rashut del Ladino  para sovreguadrarla i krear muevos biervos  para  ayudarla a estar en uzansa en muestra epoka.  A lo ke yo sepa malorozamente nada fue echo de konkreto fin oy en dia.  La mayoriya de los sefarades i sus desendientes israelianos no fueron del todo motivados para ke eya seya kreada  . El ministaryo de la kultura israeliano no se si se entereso a este proyekto i si mizmo su tema  le fue eksplikado anchamente para solisitar ayudo  i un budjeto sin el no sera posible establisirla.  Pekado  por el idioma i por muestra kultura  ke kedaron guerfanos al seno de la mas grande komunidad  sefarad del mundo. La kayadez i su komportamiento  negativo sovre esta kestyon no mos dara una buena fama istorika a todos los ke pensan ainda en ladino i miran de pratikarla i eskrivirla.

Bien,unos  de mi lektores me demandaran  por siguro kualo kale azer para  avansar el proyekto?  La verda es ke no se kualo responderles  de konkreto visto ke no tengo  dinero en demazia en mi fondasyon ke ayuda el Instituto Salti  el kual konsume la mayoriya de su budjeto anual.   A mi avizo la sola koza de positivo ke se puedra azer al momento aktual es de demandar a traverso las platformas sosialas a topar filantropos ke kereran ayudar el establisimiento de la Akademia en partisipando a una komisyon ke se establira al seno de la Rashut  del Ladino i ke mirara de arekojer grosh por grosh donasyones  de los amantes de muestra kultura . Grasias a este fondo se podra organizar  lavoros de un grupo de presyon politiko ke influensera el futuro governo a okuparse de la Akademia i ansi darles a entender ke para Israel, la Akademia avrira kulturalmente una puerta mueva en el mundo espanyol visto ke eya sera miembro aktivo de la asosyasyon ‘Asala’ ke regrupa 23 akademias espanyolas reprezentando 23 payizes diferentes.

Ademas un sigundo punto importante sovre el futuro del idioma es la mankura de eskrivanos ke miran a enteresarse a la vida de kada dia en Israel, al aspekto politiko, sosyolojiko del payis.  Es ansi sigun mi penseryo ke se provara ke el ladino esta bivo i se puede uzar para darse a entender sovre evenimientos aktuales. Esto, no fui nunka kapache de konvenser a eminentes personajes  de muestra sosietad ke eskrivieron i kontinuan a eskrivir sovre el pasado nostaljiko de sus chikes sea en Israel, sea en la diáspora, a transmeter sus investigasyones istorikas de 2000 anyos , analizar la vida ke tuvieron los djudios en Espanya, i durante el segundo galut en el Imperio Otomano, el antisemitizmo politiko del sieglo pasado, la Shoa i mas. No ay duvda son sujetos  urjentes de grande importansa  ke se deven eskrivir. Ma la lingua kon la kuala estos sujetos son eskritos no ayuda  al dezvelopamiento del  vokabularyo nesesario de la lingua avlada de kada dia

Por modo de esto enkorajo a todos los ke dezean uzar el ladino por sujetos aktuales  de eskrivir sin aflosharsen i de no deskorajarsen kuando un biervo les falta , de no kansarsen para krearlo.  Siempre adelantre si keremos uzar muestra amada lirika lingua.

El treser punto para mi es de demandar a todos de eskrivir para luchar kontra el antisemitizmo pujado  estos ultimos anyos en el mundo.  Kada  uno de mozotros sovre sus orijines de enteresarsen al antisemitizmo del payis en el kual se engrandesyeron.  En mi kavzo vos kero transmeter mi sentimiento sovre el antisemitizmo en Turkia.  Dezde  de los Otomanos siempre uvo antisemitizmo en la umas ke kompozavan el imperio. Los kristianos  otoktonos en mayoriya kreendose al mit de la muerte de Jesu (Yeushua) pratikaron el antisemitizmo relijiozo. Los muzulmanos   de mezmo pratikaron un antesemitizmo moderado fin a el establisimiento de la republika. El kemalizmo sekular i la disparisyon del imperio izo pujar el antisemitizmo politiko de los fondamentalistos muzulmanos i de los nasyonalistos en el empesijo del sieglo pasado.  Kon la fondasyon de Israel i  la influenza del nasyonalizmo arabo el pujo muncho mas. En muestros días el antisemitizmo vino al nivel maksimal istoriko kon la vinida al poder en este payis, del partido ‘Justisia i Dezvelopamiento’ 15 anyos antes. El prezidente  Tayyip Erdogan siendo un dishiplo de los Ermanos Musulmanos  konfrereria araba ejipsyana ke en su doktrina mensyona la destruksyon de Israel, es un antisemito lo ke yamo yo “medyo”. No ay duvda el se konsidera inimigo de Israel ma komo bivyo kon los djudyos en Estambol los proteja komo dimnis i no refuza a la chika komunidad djudia su ayudo.  Ma en jeneral los turkos blankos(kemalistos -laikos) keren bien a Israel, a los djudios de Turkia i la mayoriya de los  miembros de la armada turka respektan muestro payis por ke save defenderse i krear armas de defensa. Ma  kaji 78 por sien de la povlasyon pensan ke Israel aliado de los Estados Unidos es inimigo de la Turkia, ke maltrata a los palestinianos muzulmanos, konkista terra musulmana, ke tiene proyektos imperialistos sovre el  Medyo Oriente i ke ayuda a los Kurdes a estableser zonas otonomas en Siria i en Irak aliados del PKK ke lucha kontra Ankara.

Difisil para los djudios ke biven en este payis de respirar sin sar. Lo mijor sera para eyos de salir de aya o sino de bivir en kayades, eskondidos en una forma de geto onde kontinuaran a frekuantarse entre eyos i por lo mas kon los turkos blankos, asperando kon pasensia  un trokamento de governo !