Los Djenizaros (Yenicheri en turko), fue una mueva milisya kreada por el sultán Orhan en el anyo 1334 sovre el model de los Mamelukes del Ayifto, ke eran prizyoneros, kativos arabos los kualos fueron konvertidos en armada de defensia segun el prensipyo ‘Pencik’ (eskojer de 5 uno solo). Verdaderos guardyanos personal del sultán (rey), de su dinastiya i de las frontieras del estado, eyos en el empesijo de la formasyon eran prizyoneros de gerra por lo mas kristyanos, ma kon los anyos, durante 2 siglos i mas se dechizyo de formar un muevo modelo de djenizaros, en tomando los chikos guerfanos de gerra de los payizes kristyanos de los Balkanes konkistados. Eyos fueron yevados en Anatolya ande famiyas turkas muzulmanas las kualas les ambezavan el turko, el arabo i la relijión muzulmana, sovre la doktrina de’ Hadji Bektash’ (bektashizmo es una doktrina relijioza isoterika fondada sovre los prensipyos del shiizmo i del sunnizmo muzulmano), finalmente eran echos berit milla.
La ‘mecelle’, la ley bazada sovre el Koran dize ke todo modo de guerfano de gerra es proprieta del sultán. Ma durante el 17 en siglo komo la konkista evropea de parte de los Otomanos se avia arestado en las puertas de Vienna i no avyendo mas guerfanos de gerra, eyos ampesaron a arevatar los ijikos chikos de los puevlos sometidos de los Balkanes, tal los Albanezes, Boshnakes, Serbos, Bulgaros, Gregos i Armenos en bazandose sovre la ley ‘Devshirme’ (konversion). Una ves en edad de poder tener armas, estos konvertidos durante 7 anyos bivian en kazernas onde eran formados a ser soldados de kalitad. Los ke no estavan en este estado o ke eran bastante intelijentes los mandavan a la eskola ‘Enderun’ para ke se agan fonksyonaryos siviles. Entre eyos, en la istoria del Imperio uvo vezires (ministros) renomados. El djenizaro una ves formado peryeva todo el kontakto kon su famiya i su orijen, para el, solo el sultán kontava por el kual tenia una fidelita infinita. Las primeras kazernas fueron establisidas en Edirne, ma despues de la konkista de Estambol muevas kazernas grandes fueron fraguadas en diversos foburgos de la sivdad.
Yamavan ‘Odjak’ sus kazernas ke eran sovre los ordenes del ‘‘Aga”, el komandante shefe de la milisya. El aga era para el djenizaro no solo komandante en la batalya ma la persona del kual dependía su vida. Era el ke los djuzgava kuando kometiyan yerros graves i el solo ke teniya derecho de matarlos. El aga teniya un grande poder al seno del governo i posedava el sigundo rango despues del sadrazam (primer ministro). El aga dirijava los Odjakes prinsipales i el Acemi Odjak de los aprendistos (chirakes). Lo yamavan en mizmo tiempo buyuk chorbaci (el grande distributor de supa), ke era la komida prensipala del soldado ke se preparava en grande kalderas yamadas ‘kazan’. El distribuava la ‘ulufe’ (mezada) kada 3 mezes i sovre el orden del sultán el ‘culus’ ke reprezentava el bahshish ke meresian.
Dezde del anyo 1512 los djenizaros no tenían derecho de kazarse i tener famiya asta una aedad avansada, ma despues de aver akuisado el grado de ‘chavush’ (serjente) lo podía. Razon por la kuala la omoseksualita era bastante propajada. Ma siglos mas tadre este uzo fue por razones ekonomikas i sosyalas anulado, lo ke les permetyo de bivir afuera de los Odjakes en sus propyas kazas i poder tener famiya. Los ijos de eyos nomados ‘kuloglu’ fueron otomatikamente achetados a ser djenizaros. Verso el anyo 1575 los kristyanos de los Balkanes avian refuzado kon fuersa a entregar sus ijos a la armada turka, ansi el devshirme fue anulado lo ke ovligo el Saray (palasyo real) i el governo de achetar turkos i muzulmanos del imperio a ser djenizaros. En tiempo del Sultan Orhan no eran muy nombrozos ma despues de la konkista de Estambol i de los Balkanes sus nombres pujaron muncho, se pretende ke arivaron a ser kaji 100 mil personas en una peryoda del reynado. En tiempo de pas sus lavoros era de azer la polisia de las sivdades onde estavan embiyados, prensipalamente en Estambol, en Salonika, en Edirne, en Bursa, en Belgrad, en Buda, en Libya, en Tunisia i mas. Ademas eyos kontrolavan las torres i las frontyeras del estado i se pretende ke la milisya de los djenizaros kuando fue kreada fue la primera armada permanentemente organizada de la Evropa. La istorya mos ambeza ke los evropeos perkuraron un siglo despues de poder tener una armada semejante.
Kon los anyos, el komporto malo de los djenizaros kavzo muncho mal a esta ‘konfradia’ mita gerreyadora mira relijioza ke acheto a tomar en sus rangos turkos i muzulmanos a los kualos se infiltraron todo modo de djente sanglinarya, mal onesta, kemando djente i proprieta, kaji barbara lo ke kreyo un atmosfero intoleravle en el Imperio i partikularamente en las minoridades sometidas, tal los turkos proves, los kristyanos i los djudyos, los kualos sufrieron lo mas. Ademas verso el 19en siglo munchos de los djenizaros, refuzaron de gerreyar i uvo entre eyos elementos ke solo resivian mezada sin vistirse mizmo la uniforma en azyendo mil i una dalavera. Entre eyos uvo ke izyeron komerso de sereales i ansi se izyeron muy rikos. Esta situasyon kontinuo anyos visto ke el Imperio kada nada peryiva de su fuerza i de su otoridad. La kasha vaziya del reynado i las guerras pedridas ke no se eskapavan kontra los imperios Ostriakos i Rusos forso los turkos a encinoyarse en frente de sus inimigos i mizmo adyentro del payis en frente de los bandidos ke no respektavan del todo la otoridad de Estambol. Durante estos dos siglos se vido ke sultanes, vezires grandes fueron destituidos i matados por los djenizaros. En la kapitala Estambol solevantamyentos i revoltas (kazan kaldirmak en turko) fueron frekuentes, sus opozisyones a todo modo de reforma avyeron el kamino de la perdisyon del payis. Durante los siglos 18 i 19 el Imperio Otomano peryo muncho de su territoryo Balkaniko, i a justa razón los sultanes de esta epoka miraron a eskabuyirse de los djenizaros en formando muevas armadas al modo evropeo de la epoka i poder venser i salir a bash kon el banditizmo anatoliano i orientalo.
Enfin en el anyo 1826 el sultán Mahmud el sigundo dyo fin a la milisya de los djenizaros kon una mueva armada en matándolos durante una verdadera gerra en Estambol o egzilandolos a las sivdades leshanas de la península Arabika. Mas de 15mil de entre eyos fueron matados en un solo dia i otros 17mil partizanos forsados a salir de la kapitala i ir en egzilyo. Vakay-i- Hayriye (evenemento de byenfezensia) se yamo esta eskabuyisyon de los djenizaros.
Joseph Nehama en su livro sovre la istoria de los djudyos de Salonika konta ke los gregos, los djudyos, los donmes (sabetayistos) i mizmo los muzulmanos relijiozos fueron anyos sujetos a la tirania de los djenizaros. Los kristyanos eran en partida protejados por los payizes evropeos, ma los djudyos siempre kedaron sin proteksyon. El mozda a saver ke munchas vezes en pasando delante de una butika rika aparteniendo a un djudyo el djenizaro no se deteniva de entrar i de asentarse para demandar informarsyones sovre lo ke se ganava al dia i si el patron nesesitava proteksyon. Si el resiviya un bahshish importante, un jenero de segurita para el patron, konfirmava de retornar en diziendo, ‘de oy en dia somos haveres (sosyos)’ i en prometiendo ke dingunos mas no lo dezrepozara. Ademas konta, ke en las kayes de Salonika, eyos borrachos tinta, aharvavan los pasantes sin razón i les tomavan todo lo ke posedavan. Los djudyos la noche se espantavan a salir a la kaye i si eran ovligados de ser akompanyados de uno de eyos kontra un bahshish para no ser deranjado.
Deves en kuando el djudyo se empereyava de ser maltratado i sovre todo kuando avia un miembro de su famia matado por un djenizaro de mirar a vengarse. Las otoridades en jeneral miravan de tapar el kavzo del espanto ke los del odjak no se revolten. En un semejante omisido el djenizaro si era djuzgado riskava de ser aogado por el cellat (matador) de la prizyon. Kuando un djenizaro desparesiya misteryozamente sus kolegas lo topavan muerto al dia despues en la plaj al bodre de mar. No se dubyavan ke un djudyo podíya matar un djenizaro. Ma en realita los mansevos djudyos ayudavan al ke demandava venganza a aferar kon pasensya el kupavle i kuchiayaro fina ke se muera. No era difisil en lo aliskuro de la noche, kon akavido, yevar su kadavro i decharlo en la plaj.
Ademas Nehama konta kuando el orden del sultán Mahmud sigundo vino a Salonika, la torre de la sivdad ke era el odjak de los djenizaros se transformo en prizyon i serka 3mil de eyos fueron aguados uno despues del otro por los cellates. Ansi la torre tomo el nombre de ‘Torre de sangre’. Poko despues la Torre se avia echo una prizyon para los kriminales. Sovre esto la otoridad de djustisya de la sivdad dechizo de enkalar la torre de blanko para azer despareser la sangre de los djenizaros.Un djudyo Natan Guilidi, prizyonero ke avia kometido un omisyido apasyonado fue kargado del lavoro, grasias al kual el fue liberado de su pena poko tiempo despues ke avia eskapado su lavoro. Esta fue la razón ke la torre de Salonika dainda se yama ‘la torre blanka’.
Ansi se eskapa la istorya de los djenizaros ke avriyo el kamino a mas de libertad i de igualita enfrente las muevas leyes echas para todos los sivdadinos del reynado.
Dr. Selim Salti – 4/2024
