Flag of Israel

ISRAEL MIRAKOLO SIN SEMEJANSA

by Uncategorized

Dezde su fundasyon ay 75 anyos Israel no tuvo deltodo repozo kon sus vizinos, ma malgrado esto supo sovrebivir grasyas a la unyon del puevlo djudyo i de la asistensya moral i material de los Estados Unidos. Durante esta perioda milyones de djudyos retornaron a la tyerra de sus padres i kon grande determinasyon fraguaron un payis demokratiko, fertilo, militarmente fuerte, a la punta de la teknolojia del dia de oy, ke se izo lugar de vida oroza para la mayoriya de sus sivdadinos inkluzo las minoridades muzulmanas, kristyanas i mas. Mizmo el 20 por sien de la povlasyon ke se deklara povre es mas rika de munchos puevlos biviendo en la Afrika i en la Asya. En poko palavras Israel es un mirakolo sin semejansa en este mundo.

En los diyas pasados komemorimos los 6 milyones de djudyos ke fueron masakrados por los alemanes nazistos i sus kollaboradores evropeos. Kuantos de eyos se podiyan imaginar en el kamino de la muerte ke en 2023 el puevlo djudyo selebrera los 75 anyos de la egzistensya de Israel, payis independiente djudyo rekonosido por las nasyones del mundo. Kuantos de entre eyos ke se podyeron salvarsen i ke dainda biven kon mozotros se podían kreer de ver i fiestar este diya.

Es triste de sentir de la boka de los antisemitos ke los djudyos israelianos komo los de la diaspora se azen mas mal de si parasi ke del akeyo de los inimigos terroristos ke miran de derokar el uniko payis djudyo del mundo. Eyos pretenden mizmo ke Israel no va egzistir mas de 80 anyos, visto ke la istorya mos ambeza ke la endependesya de los estados djudyos no depasaron este tiempo.

En los dalkavos mezes, en Israel, los diferentes ke aparesyeron entre la povlayon sovre la independensya del sistema legal i de la manera de eskojer los cuzgadores la diviza en dos kampos ke se akaran danjorozamente. Kuando un puevlo esta arimado a la pared por sus inimigos, tal komo Israel, no será djusto de peleyarse por sujetos internos ke se poden kon pasensya i voluntad atakanar kon el tiempo, en topando kompromizos. No kale dar la oportunidad a los inimigos nombrozos de atakar Israel en pensando ke se esta aflakando en peryendo su ideal de ser una nasyon unida. Ademas difisil de no pensar ke las futuras jenerasyones no van a fiestar el sentenaryo de Israel, payis progresisto ke se engrandesera mas i ken save, será uno de los mijores de la egzistensya umana.

En fiestando kon alegría el dia de independensya fuimos todos los djudyos konsientes ke Israel bivira no solo por ke es i será un payis adelantado o por ke muestra rasa, muestra relijyon es diferente, ma porke somos ermanos de una sola i mizma famiya. Puede aver divizyones entre ermanos, pletos i aravyas, ma egziste en mizmo tiempo kerensya, amor i sensyo de responsabilidad de parte de kada uno de mozotros. Devemos ser unidos para reushir los 75 anyos vinideros. Kada diya ke pasara despues de este aniversaryo mos trayera mas muncho azlaha kuando pensamos ke del punto de vista enerjiya Israel es independiente, su adelantamiento en el domenyo de la teknoliya avansa a grandes pasos i el fakto ke el GDP per kapita es mas alto de 50.000 dolares. Vos akodrare ke este mizmo shifro era de 21.000 dolares en el anyo 2000, i de 2.000 dolares solo en 1970.

Mos demandamos kon razon, despues de este diya gloriozo komo reglar los problemes importantes de muestro payis. La kestyon palestiniana es i será la mas importante de eyas. Se kere kon pasensya kontinuar a azer todos los esforsos demenesterozos para konvinsir el mundo muzulmano sunnito komo shiito ke estamos prontos para una pas justa kon los palestinianos si eyos achetan Israel i ke entendyen ke dinguna fanteziya militar no los ayudara a echar los djudyos a la mar. Sovre el sujeto de solusyonar este problema ay ken propozan la separasyon de la tyerra en 2 estados, otros una administrasyon kantonala dekalkada sovre el rejimen suisso ke dura dezde siglos, ken avla de krear una federasyon entre los territoryos onde bive la pozlasyon araba de Yehuda i Shomron kon la Jordania i mas. El governo aktual devra dunke lavorar sovre dos kampos, retablisir la pas en el payis entre los laikos i relijiozos en la kestyon judisyarya i okuparse seryozamente para dezvelopar remedyos por la kestyon palestiniana.

Enfin miraremos a ver grande en muestro futuro, este payis es una “success story”, devemos mizmo en momentos de apreto realizar lo ke se parvino a azer en este payis es immensyo i ser orgoyozo de El.

Dr. Selim Salti, 2023

emblem of israel

EL DEZASTRO KE BIVIMOS

by Uncategorized

Kada ora ke bivimos en este diya del 23 Octobre 2023 en la kuala eskrivo este artikolo, mos akodra ke la gerra de Israel kontinuara mezes sin eskaparse. Esta gerra kontra el antisemitizmo ke se transformo en antiisraelizmo kontinua sin piadad a kerer matarmos i ansi a destruyir Israel. 2 mil anyos biviendo en el galud no podimos defendermos, ma kon el establisimiento de Israel, miramos a defendermos komo uma. Fin oy en dia dezde la kreasyon de Israel mas de 25 mil djudyos fueron matados en las gerras kontra el inimigo arabo. Oy la verda es ke kon el atako del Hamas i de sus haveres teroristos en el sud de Israel al dorredor de Gaza el nombre pujo en un solo dia de shabat, de 1400 muertos. Sin kontar los 197 kaptivos ke fueron yevados a Gaza, por los kualos no avra muncho mazal de kedar en vida.

Los israelianos sean djudyos, druzes o beduenos kombaten Hamas kon fuerza i kon razón miran de vengarsen de las salvajerías ke kometyeron sus miembros matando, degoyando i kemando siviles de estas 3 komunidades. Israel no dechara pasar este atako salvaje sin venganza. Malgrado todas las presiones de muestros aliados del oksidente ke demandan ke seygamos prudentes a no matar siviles en la zona, de dinguna manera no se puedera arestar el bombardamiento de Gaza i de tener en kuento ken es sivil o ken es terroristo kuando la armada entrera en el territoryo. La gerra es echa kontra el Hamas ma no kontra los arabos de Gaza, los kualos en mayoriya se fuyen verso el sud para no ser matados. Koza ke Israel enkoraja por ke el Hamas es en mizmo tiempo inimigo de su puevlo en tenyendolo komo eskudo de gerra, en forsandolo a ke kede en su lugar en kavzo de atako.

Eske Israel una ves ke mandara soldados ariento de Gaza será kapache de matar a todos los miembros de las diferentes organizasyones terroristas? No se save i si mizmo reuche difisil será de azer despareser la idea kreada por los ermanos muzulmanos de destruyir Israel. En vista el Ayifto ke avia refuzado de la boka de Sadat de achetar a kontrolar esta zona, será muy difisil para el jeneral Sisi aktualmente en poder de kerer apatronarse de los arabos de Gaza, siendo el mizmo inimigo el mas importante de la doktrina de los ermanos muzulmanos, ke kombate al interno del Ayifto.

Viniendo a Abbas de la Otoridad Palestiniana no ay esperensa ke el Fatah será en posibilita de tomar a tras la direksyon de los sivdadinos da Gaza del kual fue aranjado militarmente por el Hamas en 2007. Ma difisil de entender deke los payizes arabos ke enkorajan la gerra kontra Israel refuzan de resivir momentanamente refujiados de Gaza en sus territoryos. El espanto es por seguro de no introdusir en sus payizes djente del Hamas i de las otras organizasyones terroristas kon intisyones al model de Isis. Eyos preferan ke los de Gaza sean kurban, en yamandolos ‘shahit’ por la kavza palestiniana. Poko los emporta si kedan en vida.

Viendo esto Israel deve atakar kon fuersa al interior de Gaza i devra matar lo mas de terroristos posible sin preokuparse de los siviles visto ke eyos azen parte de la gerra. Los ke fuyeron al sud serán en mijor kondisyon de los ke se kedaron en la sivdad de Gaza, lugar prensipal de los túneles onde se eskonden los terroristos. Ma la verdad es ke si mizmo Israel reuche a 100% a okupar la sivdad i alimpyarla de los inimigos, eya va ser kondanada de kometer jenosidos de los arabos por manaderos publikos del mundo, mizmo por los aliados de Israel. La razón es simple, los del Hamas peryeran la gerra fizik, ma la ganaran grasias a sus propagandas al seno de los milyones de arabos i serka de los antisemites del oksidente. Esta lucha no es fasil i demanda muncho lavoro. En el pasado Israel kayo chiko en sus aksyones militares, porke la inimista kreada grasias a los medyos de informasyon sosyales el Hamas i su klik fueron kapaches de poder azer sus propagandas mintirozas kon grande fasilidad.

Eyos son sustenidos por organizasyones governomantalas i non governomantalas ke lavoran en forma de 3 maneras. La primera es de deklarar ke los atakes del Hamas son el sembol de la rezistensya kontra el estado kolonial i sus kolonizatores. Israel devra despareser en serka visto ke el es kolonizator i pratika el ‘aparteid’. La segunda manera es de enventar mintiras akuzando Israel de matar ijikos, madres i viejos, atrosidades iguales a las del Hamas en las medias mondialas i influesiendo ansi las politikas de payizes ke son amigos del puevlo arabo. La tresera manera es de konveser la opinión mondiala de manera direkta o indirekta en akuzando Israel de kerer kon maestredad justifikar sus intinsiones de entrar a Gaza, lo ke kavzara miles de muertos siviles.

Kada momento ke pasa durante estos dias devemos ser prontos a muevas emosyones. Pekado a Israel ke es la luz de la demokrasiya i de la djustedad en la jeografia onde se topa. Los terroristos de las kuatro puntas del mundo i sus partizanes lo aborresen pormo de esto.

Dr. Selim Salti     23/10/2023

LA ALIANSA SIONISTA DESPUES GAZZA

by Uncategorized

Kualo se poderiya dezvelopar en el pensamiento israeliano el dia despues de la gerra de Gazza? Kualo los soldados ke retornaran del fronte keraran ver komo trokamiento en la politika interna i komo pensar sus futuros en el payis por el kual gerreyaron i kontinuaran a gerreyar para defenderlo?
Estas kesyones meresen ser estudiadas porke una mueva alianza sionista será demenester, echa entre los diferentes sektores de la povlasyon djudiya. Durante las batalyas seve komo los soldados de la formasyon derecha i akeyos de la siedra sin distenksyon se defenden kontra el inimigo Hamas kon munchisimo eroizmo i ermandad. Los ke vinieron de Yehuda i Shomron, los Druzes, los beduenos, los relijiozos i los sekulares komemoran la memoria de sus amigos ke kayeron enfrente de sus ojos i toman dolyo enjuntos. Esta ermandad por seguro ke la kereran kontinuarla el dia despues de la gerra.
El dia despues de la gerra apartenera a las famiyas de los ke kayeron los kualos pagaron de sus vidas el presyo alto. Por seguro ke estas famiyas no achetaran a ke sus keridos ke se sakrifikaron por la patria, fue en vano i ke un muevo sistema politiko mas kudyozo de la defensya del puevlo no sea establisido. Entre myentes eyos purfiaran a ke los yerros politikos de defensya kometidos durante los anyos pasados no se repeten. Ademas sovre el problem palestiniano, ke no sea dechizado por las potensyas grandes i chikas en las Nasyones Unidas sin tener en kuenta el futuro de la egzistensya de Israel.
Este dia apartiene en mizmo tiempo a los ke fueron evakuados de sus kazas, a los kaptivos i a sus famiyas, a miles de blesados i a los ke sufrieron de diferentes maneras de la gerra. Estos asperaran un trokamiento radikal en la realita israeliana, kon la esperanza ke sus sufriensas no fueron vanas. Myentres despues de Gaza los mansevos mirando la situasyon del payis se demandaran komo avansar en la vida, ke forma de futuro los aspera.
El dia despues de Gazza, los israelianos devran meterse de akordo en 3 kozas. Deke se izo esta gerra, las valores i el karakter del estado por el kual devemos kontinuar a gerreyar i kualos son los kompromizos ke devemos azer para kedar unidos. La repuesta a mi avizo será ke la politika futura del payis devra ser organizada por la Derecha, el Sentro i la Siedra enjuntos, kon pragmatizmo, responsabilita i de dirijar el estado en un modo de kollaborasyon malgado las diferentes opiniones politikas en eliminando la relasyon kon el mesianismo i el anti-sionizmo.
Los masakros del 7 Oktobre i sus konsikuensas kreo una unita nasyonala egzamplarya en el puevlo israeliano para kombatir la kruelda araba, koza ke los istoryanos konfirman i ke rala semejante unyon se vido en la istorya umana. Esto devra ser la baza de un muevo rejimen politiko en Israel onde las diferentes doktrinas politikas egzistentes devran trokar en sus maneras de komportarsen. La derecha devra lavorar en sus engajamentos sovre las valores liberalas demokratikas las kualas mos unisan kon muestros aliados evropeos. Los de siedra devran sin falta abrasar el Djudaizmo i el Sionizmo mas klaramente. Todo esto dará fuersa al atedijo a la tyerra de Israel, a muestra erensya i a la lejitimitad por la kuala gerreyamos para mantenerla.
Despues del diya de Gazza devemos fraguar un muevo sistem politiko bazado sovre la alianza sionista en metiendo de lado todos los ekstremizmos para ajuntandomos en el sentro. Olvidar la mentalita de konkerensya tribala egzistende oy en la politika aktuala, ma de mirar de establisir una ‘demokrasiya djudiya’ la kuala tendrá yugo de todos los israelianos i mizmo de los djudyos de la diaspora ke son inseparables de la uma. Sera nesesaryo un proseso delikado de negosyasyones por ke devemos ser atentivos a muestras ovligasyones i derechos de sivdadinos las kualas devran ser iguales entre todos los israelianos inkluzo los árabos israelianos i los ultra-ortodokses.
No poedo pretender kon konviksyon ke todo lo ke eskrivi aki arriva se realizara despues la gerra en un kurto tiempo, visto ke la inimista de Israel i el antisemitizmo mundial de una parte i el pololarizmo entre los partidos politikos en el payis serán faktores importantes a luchar. Malgrado esto dizere ke los evenemientos del 7 Octobre mos ambezo lo ke mos kosto la” anchura” i el “inkonsientimiento” de la administrasyon del payis i ke el solo remedyo será de tener un governo mas ekilibrado entre la derecha i la siedra, si no la leson de Gazza será vana.

Dr. Selim Salti   14/1/2024