LA LUCHA I EL MIRAJE DE ISRAEL

Munchos espesialistos en la politika del Medyo Oriente, jurnalistos renomados, politisyanos oksidentalos, dirijentes de payizes importantes i mas djente, no se kansan de diskutir la gerra ke Israel yeva kontra el Hamas, el Hizbullah i el Iran i de dar sus avizos kon insistensya komo trayer la pas a esta rejyon del mundo. Se echan kon la idea de un muevo Medyo Oriente i se alevantan kon una vizyon sovre la kuala eya permetera a todos los payizes de la zona de bivir en pas sin tomar muncho en eguardo las prinsipalas kavzas del konflikto.  La mayoriya de las propozisyones diktan a Israel la idea de 2 estados, un al lado de otro, ke se respektan i biven en pas. En otra dicha dar tyerra para merkar pas. La idea no es del todo mueva, despues de la gerra del Golf en 1991, de los Akordos de Oslo en 1993 i finalmente el pakto de Avraam 2020 kreyo esperansas vanas bazadas sovre esta idea.

 
Los arabos nunka achetaron la idea de pas kontra tyerra, malgrado ke Israel a munchisimas okazyones acheto esta propozisyon. Komo se save, el buto de la filozofiya politika del puevlo arabo es la konkista integrala de la Palestina kreada por los Inglezes i Fransezes despues de la Primera gerra mondiala. El slogan ke se oye dezde munchos anyos es ‘Del riyo fina la mar la Palestina será enteramente liberada para los palestinianos’. Basta ke Israel se afloche el será destruyido totalamente. La gerra de oy ke es puchada por el Iran se baza sovre esta idea, kaji relijioza. Dunke dezde mas de un anyo Israel lucha kon el Hamas en Gaza i kon el Hezbollah en en Libano i no manka de dar repuestas a las fuzes ke arivan del Yemen o de su aliado el Iran el kual es el kavzante de esta lucha bastante pezgada.
 
 
Komo eksplikar a los aliados de Israel ke le abastesen armas de konverserlos ke el una ves en eskapando de destruyir las kapachidades militaras de estos dos inimigos proksis del Iran ke la politika entera del Medyo Oriente va trokar.  El miraje de Israel es de krear un muevo Medyo Oriente en aliansa kon los arabos sunnitos donde el prensipal faktor es la Arabia Seudita. De establisir la frontiera kon el Libano dirijado por un governo sin la partisipasyon del Hezbollah. Mirar a ke la Otoridad Palestiniana se organize eya mizmo en azyendo un esforso de pas.
 

Es verdad ke no es posivle, komo los Amerikanos kijeron a demokratizar los payizes arabos vizinos i del doredor de Israel. Dezde de la administrasyon Clinton los amerikanos purfiyan sin sukseso a modelar la politika de la rejyon i de la sosieta araba. Se ve la fuerte rezistensya a todo modo de trokamyento politiko i sosyetal ke viene de afuera sovre todo del oksidente.  Mizmo la Evropa istorikamente avlando metyo muncho tiempo, siglos a demokratizarse, ke mizmo dainda en siertas partes del kontinente eya es delikada. Porsupesto los payizes arabos ke son relativamente establisidos despues de la Primera gerra mundiala kon frontieras ke no koresponden a la realita de sus puevlos, las kualas fueron trasadas por el poeder kolonialisto, krean relasyones difiles entre los payizes de la zona, la Siria, el Irak, el Koveyt, el Iran, Los estados del Golf, la Turkiya ke no eskapan de peleyarsen. En kurto diremos ke mizmo una demokrasiya primitiva no puede ser establisida en el Medyo Oriente, onde, a la eksepsyon de la Turkiya el feodalizmo islamisto no kambyara kaji del todo. Se ve en los payizes arabos la insufizensya de no poeder krear una administrasyon sentrala i otoritarya ke kontrola i monopoliza las armas. Los trivyos dainda se arman i diktan sus prensipyos de vida a sus pueblos, mizmo si eyos son kontra a los del estado. Gerras siviles i la kreasyon de milisyas armadas en Irak, Siriya, Lebano, en los territoryos palestinianos, Yemen, Sudan i Libya egzistera siempre.

En despartes, la relijión al kontraryo del mundo oksidental djuga un rolo sentral en la politika del Medyo Oriente, eya la modela a su manera. Los mesajes radikalos son oyidos kon grande atansyon i mizmo el ekstremizmo ke propajan. Los masakros echos por el ISIS i el Hamas son los produktos de este andoktrinamiento.  Un otro dezakordo en el mundo muzulmano es la inimista egzistiendo dezde siglos de los sunnitos verso los shiitos. La razón por la kuala el Hezbollah en el Libano i los Utis en el Yemen son los proksis del Iran es pormo ke la relijyon los unise. Los sunnis no tienen konfiensa en los iranianos no solo por ke son shiitos ma porke apartienen a una nasyon ke aborresen.

La leson para Israel visto la situasyon embrolyada en su rejyon, es ke el deve armarse para defenderse munchos anyos mas. Periodas onde las tansyones se amenguaron son posivles tal grasias a los akordos kon el Ayifto o kon la Jordaniya. Se aspera ke la mizma situasyon se poede krear kon la Arabia Seudita, ma la kompleksita egzistyendo sea en la rejyon sea en las dinamikas deskrividas aki ariva no enkorajan una egzistensya pasifika. Israel devra ser pronto a toda modo de evantualidad en siendo siempre pronto a defenderse, por la sola razon ke a kada momento las kozas en un supito pueden trokar.
 

Dr. Selim Salti  20.10.2024

 

  

EL DESTINO TRISTE DEL DJUDYO

La inimista del djudyo en este mundo de mas de 8 miliardas de umanos se puede dar a entender kon un solo bievro “antisemitizmo”. No ay persona en el oksidente kristyano ni en el oriente muzulmano ke no sepan lo ke reprezenta. El reprezenta el aborresimiento de este uniko puevlo el mas antiko de la egzistensya umana. Deke es ansi, la istorya lo da a entender; miles de livros, de filmos i mas fueron eskritos o echos a este sujeto. Eya troka de facha kon las epokas i en muestro tiempo se dezvelopa porke ke los djudyos fueron kapaches de retornar a sus tyerras istorikas en establesiendo un muevo Israel, en gerreyando todo el tiempo, en sakrifikando sus ijos para defenderlo. Kon grande abilita establesieron una republika demokratika enfloresente grasias al saverisyo de sus sivdadinos.

Ni los menospresyos de los goyes, ni los pogromes de la Evropa oryantala, ni la Shoa no abasto para eliminar el djudaizmo, al kontraryo kon sangre i sakrifisyo el alevanto la kavesa i se rendyo independiente al seno de los payizes liberos en kreando Israel. Ma una koza kuryoza es de ver oy en dia ke la mentalidad negasyonista no kere achetar a ke los djudyos a traverso Israel seyan achetados a bivir en un payiz ke les apartiene i ke en munchos kampos de la sivilizasyon moderna sean vistos a sus djustas valores komo los mas mijores de la planeta. El selo i el dezeyo krea kada dia un muevo antisemtizmo ke se deve konbatir kon fuerza i determinasyon. A kada individuo ke se siente djudyo kaye la responsabilita de ovrar en este lucha ke no esta para eskaparse.

Dingunos no pueden responder klaramente si muestra planeta se izo mijor en los 2 dalkavos siglos malgrado las realizasyones siantifikas i teknolojikas ke yamamos ‘progreso’. Yo dire ke el mundo se izo mas mirikiyozo, mas enprevisivle i muncho mas frajil visto ke el umano se siente instavle i flako. Ademas la vida politika i sosyala se aze kada dia mas virtual komo una foto ke se transmite en la komputadora, ansi la vida transmitida por la televizyon, la medya sosyala, la prensa o la radyo kaji es la mizma, konferensyas, enkontros politikos, konkursos sin fin son dados por sujetos ke no siempre interesan el grande publiko. Ansi los umanos se adjuntan entre eyos ma en realita se sienten kada dia ke pasa mas ajenos.

En este dorredor devemos de realizar lo ke se pasa kon los djudyos i Israel despues de la fin de la Segunda Gerra Mondiala, en el konflikto del Medyo Oriente, el kual se transformo en una plataforma de djugos politikos i de eskometas sin fin entre las grandes potensyas, los payizes arabos i varios politikos ke miran a traverso el “proseso de pas” de metersen en valor para poder resivir un premyo Nobel de pas. A la okazyon vos dire ke el komite del Parlamento de Norvegya en eskojendo de nomar Yaser Arafat a ser primado, shoko el mundo entero i desde de akel dia ke el titolo peryo de su valor, ke era konsiderado komo la mas grande rekompensa morala de la sivilizasyon oksidentala.

Durante toda la egzistensya del estado djudyo uvo gerras. Gerras ke Israel gano i otras ke no se le permetyo de ganarlas. No ay dia ke no se pensa ke un atentado terroristo puede supito advinir i mizmo una mueva gerra. Mos akodramos de los akordos de Oslo entre Israel i los palestinianos, el dado de mano entre Rabin i Arafat en la Kaza Blanka ansi ke el slogan ‘tyerra kontra pas’ i el slogan ke se arebivio en muestros días ‘Dos estados para dos payizes”. Ma dingunos no se demandan onde kaveran estos dos estados? El Fatah i el Hamas no solo no tienen promesa en sus akordos ma al kontraryo kontinuan a masakrar los djudyos. El 7 Okrobre 2023 kedara en la istorya moderna komo la mas grande matansina de djudyos despues de la Shoa.

En despartes de los palestinianos i de sus ermanos arabos los mollas shiites iranyanos se deklararon inimigos de Israel. Eyos gastaron mas de 50 miliardas de dólares para armar sus proksis ke el solo buto era de destruyir Israel i de matar lo mas de djudyos. Una ves mas, eyos fueron vinsidos ma por razónes politikas de la mayoriya de los payizes sivilizados los Israelianos fueron arestados en su lucha, sin poeder destruyir las fuersas inimigas arabas.

Un evenemento trajiko ke keda sin repuesta es la kestyon de los kativos de la banda de Gaza. Dezde mas de 500 diyas los kativos ke fueron arevatados por el Hamas se topan en una situasyon dezgrasyada. El mundo entero save ke eyos sufriyeron i dainda sufren de la ambierturya, de suplisyos, enkarselados en los túneles aliskuros debasho la tyerra sin ke puedan ser vijitados por los miembros de la Kroche Kolorada i sin poder dar a sus keridos nuvelas de vida. Esto es una kestron muy importante para los ke se okupan de los ‘Dechos Umanos’. La komunidad mondiala nada izo a este sujeto. Mos demandamos deke? Los kativos sovre las konvensyones de Cenevra son debasho su kompleta proteksyon. Ademas estas konvensyones klaramente dan a entender ke tomar rehenes es defendido, i ke los representantes de la Kroche Korolada tienen el derecho de vijitar los kativos, spesialmente kuando son firidos. A la eksepsyon de Trump i su administrasyon, dingun dirijente oksidental no meneyo el dedo chiko para kudyarlos komo se devia. Para mi dar la repuesta a esta situasyon no es difisil, digo el visyo antisemito esta siempre en la subkonsensya umana.

Dr. Selim Salti