No deve ser una surpriza de ver la Fransya, la Britanya, el Kanada de deklarar ke van a rekoneser unilateralmente el estado Palestiniano ke en realita no egziste. Pensan ke la solusyon de 2 estados, uno djudyo i el otro arabo, uno al lado del otro va reglar la kestyon del konflikto aktual del Medyo Oriente i ansi arebivir los akordos de Oslo ke fin oy en dia kedaron letra muerta. Difisil de djuzgar kon sangre fiya los altos i los bashos de las demokrasiyas oksidentalas onde kondanan las viktimas israelianas ke miran de defendersen en dando razón al terorizmo muzulmano.
Estos governos en achetando a rekonoser el estado Palestiniano por intereso de sus rejimes al interno de sus payizes están dando kon grande ipokriziya regalos i koraje de kontinuar sus aksyones barbarikas a los teroristos ke kometyeron el masakro del 7 Octobre 2023. En pasadas kon una deklarasyon komun estos tres payizes akavidaron a Israel ke tomaran sin falta dechizyones de aplikar pelanidades ekonomikas i administrativas en kavzo ke no arestara la gerra en Gaza i si kontinuara a dezvelopar muevas koloniyas en Yehuda i Shomron ke noman ‘Los Territoryos’.
Es klaro, la dechizyon unilaterala de Londra, Paris i Ottawa de rekonoser un estado Palestiniano no tiene nada de aver kon la pas entre Israel i los arabos. La realita es ke estos 3 governos keren aharvar a Israel ke se defende kontra la grande inimista de los arabos de Gaza los kualos kometieron un masakro sin presedente despues del de la Shoa. Es darles razón de matar djudyos sin defensya, koza ke es danjoroza para el futuro de la zona. No será djusto de rekonoser una entidad independiente a los arabos ke el solo buto es de matar lo mas muncho posivle de djudyos.
Los territoryos no ay duvda son tyerras djudias i no apartienen ke a Israel, miles de anyos los djudyos bivieron en Hevron, Shilod i Beit-El. Munchos siglos antes del islam djudyos bivieron en estas tyerras i kontinuan a bivir. En Gaza Israel fondo 21nas komunitades ke fueron kon tristeza abandonadas en 2005 kon la esperansa ke la pas será establisida en esta parte del payiz. Lo ke resivimos en repuesta fue roketas, túneles i terror. El dezenganyo fue grande en el publiko israeliano i por esta razón la mayoriya de los sivdadinos están de akordo ke el Hamas devra ser eliminado de una manera u otra. Se remarka ke fue yerro de akordar a los palestinianos derecho de dirijarsen de si para si, es lo ke trusho matansina, radikalizasyon i inpunidad.
Es yerro de kreyer ke la rekonosensya de un estado palestiniano va arebivir el proseso de pas. ¡Lo repeto, esta idea es yerrada porke se asemeja de achetar a dar su kaza a un despoto ke promete ke no la va kemar!
Vino el tiempo para Israel de dizir al mundo libero “Basta”. De ovrar para no regresar enverso las presiones diplomatikas i las amenazas de siertos payizes oksidentales en dándoles a entender ke si la demokrasiya israeliana kaye, sus demokrasiyas serán en periliko en el dia despues. El islamizmo no tiene limitas en su manera de konkistar terreno. Eya purfiara kon pasensya i sometimyento a englutir si le permeten la humanidad entera. Mira el egzemplo del Katar, payiz chiko kon una povlasyon apenas de 300 mil abitantes komo se apatrona lo mijor de los payizes sivilizados.
De mi punto de vista Israel devra en serka tener un muevo governo, mas unido lechos de las politikas politisianas a topar kompromisos sovre los konfliktos internos aktuales i de deklarar al mundo ke Yehuda i Shomron i deke no Gaza serán debasho la djurisdiksyon territoriala de Israel. Esto no es solo una nesesita stratejika ma es un moral imperativo. Kuando Begin avia deklarado en 1981 ke el Golan será inkorporado a Israel, el mundo avia protestado. Ma kon el tiempo los Estados Unidos i otras nasyones achetaron de fakto en los dalkavos 30 anyos ke el Golan es tyerra de Israel. Ademas kuando Ben Gurion deklaro el establismiento de Israel, munchas nasyones en el mundo miraron de deskorajarlo. La savia ke independesya no es dada ma tomada.
Las kritikas i los gritos ke se oyeran sovre esta dechizyon serán multiples. Ke esta dechizyon matara por siempre la pas. Ma deke pas estamos avlando i kon ken? Kon palestinianos ke miran de masakrarmos? Los Akordos de Avraam mostran komo Israel es respektado. Kuando Israel se siente altivo otros se alinian. Ma ajustare ke las ezitasyones invitan inimista. Si los israelianos no establisen sus frontieras otros las trasaran a su lugar.
6.6.25 – Dr. Selim Salti