Aki Yerushalayim #107 – Septembre 2022
El umano de su natura se olvida; el istoryano mira ke su pasado no se pyedra. Es ansi ke mos ambezamos komo muestros antepasados bivyeron i komo lucharon por sus egzistensyas. Sovre esto miri de investigar la lucha de los djudyos sefaradis bivyendo en Fransya, antes tres siglos, sus mansipasyones despues del egzilo espanyol i durante la revolusyon de 1789.
Los djudyos eskabuyendosen de la inimistad i sovre todo de la Enkizisyon portugeza, yegan al sud de a Fransya onde fueron yamados ‘muevos kristyanos’ i se establesen en sivdades komo Bayonne, Bordeaux, Toulouse i en sus deredores. Kon el tyempo, una vez achetados a ke bivan komo ajenos en esta rejyon del reynado, eyos se deklaran ke son djudyos i organizan sus vidas en konsekuensa en kreando komunidades. Fraguan sinagogas, establesen yeshivás, forman rabinos, guadran shabat i las fyestas djudias, komen kasher i no syerven en la armada. Establesyeron mizmo sus bet din para djuzgar konfliktos entre myembros de las komunidades. Ma malgrado todo avia entrompesos sosyales, komo para poder kazarsen por eshemplo, eran ovligados de demandar el
permeso de las otoridades lokalas.
Byen entedido estos privilejyos no fueron del todo fasil a obtener por la razon ke los djudyos no eran achetados komo sivdadinos de estos lugares. Ademas la Eglisya Katolika, grande inimiga del djudaizmo, avia kreado un antisemitizmo relijyozo enverso de estos ‘portugezes’. Los komersantes otoktonos los akuzavan de apatronarsen, kon el tyempo, del komerso de munchos produktos,
en azyendo una grande konkurensya, komo por eshemplo el del kakao i ke ademas ke avian ampesado a dar emprestimos de dinero a los kazalinos por los kualos la Eglisya no permetia a ke un
kristyano sea uzurero. Ansina los otoktones muy relijyozos no miravan kon un buen ojo a estos portugezes, kreyendosen, sovre la propaganda de los papazes i de los komersantes fransezes, ke Hristos fue matado por eyos. Durante siglos a este antisemitizmo se adjusto el antisemitizmo ekonomiko sovre todo en el este del payis onde los djudyos ashkenazis fueron akulpados de pagar grandes dasyos i de bivir en getos en yevando simanes [markas] espesiales.
Una situasyon muncho mas difisil se via en las sivdades komo Avignon i Carpentras, onde bivian famiyas djudias debasho del rejim de los papas, ke los yamavan los ‘djudyos del papa’. La provedad i la mizerya de estos djudyos en el siglo 18, era tan grandes ke mizmo los fransezes aklarados demandavan a ke sean apiadados. Vinyendo a los djudyos bivyendo en el este de la Fransya, en las
sivdades de Strasburg, Metz, Toul i Verdun, durante siglos eyos fueron forsados a bivir en estrechura en getos i pagar dasyos enormes. Byen entendido, estos ashkenazis, malgrado sus estados mizeravles, teníyan derecho de pratikar libremente sus relijyon i de tener sus tribunales rabinikos.
En el anyo 1789, se pretende ke 50 mil djudyos bivian en el reynado fransez del rey Luis XVI. Eyos eran en prinsipyo protejados por el rey, ma malgrado esto en munchos kavzos los djudyos ashkenazis
del este fueron matados, rovados, sus kazas kemadas, mizmo si no uvo pogromes. Por kontra los judyos del sud-oeste nunka fueron maltratados de esta manera.
Los djudyos no eran achetados komo sivdadinos verdaderos fransezes, ma komo apartenensya absoluta del rey, el kual los protejava kontra altos dasyos pagados a las administrasyones de las
rejyones onde bivian. Ma este derecho podia ser anulado en kualker momento.
El 28 Enero 1789 el rey Louis XVI, enfrente de la situasyon desgrasyada del payis, demando de su puevlo, en mandando fin el mas chiko kanton del payis, una letra anunsyando la konvokasyon
de los Estados Jenerales (asamblea en ke solo el rey podia reunir las 3 kategorias de la, los aristrokates, la Eglisya i los sivdadinos). La surpreza i el efekto fueron imensos. Por la primera vez desde 170 anyos el rey keria preguntar, bushkar la boka de su puevlo, en invitandolo a azer sintir su boz. Mizmo los djudyos kedaron enkantados enverso esta mueva situasyon i ampesaron a demandarsen ke djenero de futuro los asperava.
Eyos eran pokos enfrente de la povlasyon de 25 milyones de fransezes, muncho maz pokos ke los djudyos bivyendo en Polonya i en el Imperyo Austriako. En desparte de las sivdades del sud-oeste
de la Fransya, los sefaradis no eran del todo nombrozos; en Paris apenas eran unas syen almas. Kualo se podían asperar de esta mueva situasyon onde sus bozes no tenian dinguna influensa enverso la evolusyon buyendo de la povlasyon franseza i de su elit politika? Al kontraryo! Entre los anyos 1789 a 1791 los djudyos por la primera ves fueron kapaches de defender sus derechos sosyales i obtener la nasyonalidad franseza. Despues de 18 siglos los djudyos finalmente se izieron liberos i achetados komo sivdadinos. Statuto ke se espandyo en la Evropa entera kon el Imperyo Napoleonyano.
Los djudyos de Bordeaux
La komunidad sefaradi de Bordeaux, onde su orijin ampesa en el 16 siglo era de leshos la mas rika i la mas integrada. El rey Henri II kon letras patentas (akto lejislativo del rey dando un privilejyo, un derecho atado a un statuto espesyal) del anyo 1550, dyo el derecho a los djudyos de la sivdad libertad de viajar, de azer komersyo, de merkar i posedar byenes i mizmo moradas. Durante un siglo i
medyo los djudyos se avian komportado komo maranos ma la realidad relijyoza se establesyo en la sigunda mitad del siglo 17, i ansi fueron rekonosidos komo djudyos. Luis XV, durante su reyno
respekto las letras patentas, i el tambyen rekonosyo a estos ‘komersantes portugezes’ komo djudyos.
Una fuerte organizasyon komunitarya se avia establesido; ‘la Sedaka’ fue kreada para abasteser los menesteres de los myembros proves o eskayidos i a ke se respekten las leyes relijiyozas. Los
myembros de la komunidad eran ovligados de kontribuir a ‘la Sedaka’, ansi a los ke refuzavan, los apartavan de eya. Los ke tomavan las desizyones al seno de la komunidad, eran eskojidos entre los mas rikos mayores djudyos i eran eyos los ke eskojian sus shefe, el administrador, en nominando el rabino.
La komunidad enfloresyo durante el siglo 17, sus komersantes izyeron komerso kon otros sefaradis establesidos en lugares importantes de la Evropa komo Amsterdam i Londra, akumulando grandes fortunas, tal Abraham Gradis, ke desho a su muerte mas de 10 milyones de liras, i el ke fue, kon Jacob Rodrigue Pereire i Louis Francia de Beaufleury, el ke dyo grande apoyo a la vida intelektuala de la sivdad. En el anyo 1788 la komunidad tenia 2300 myembros, los kualos nunka kijeron mezurarsen kon los myembros de las otras komunidades, porke se sintian mas adelantados, mas aristokratos
del resto de la djuderia de Fransya.
Los ombres no se deshavan pujar la barva i eran vistidos a la moda franseza, al kontraryo de los djudyos ashkenazis de Metz ke se vistian en la manera klasika de los haredim barvudos. Nada de
poder komparar entre eyos, visto ke los de Bordeaux nunka kijeron vistirsen diferentamente de la povlasyon kristyana i miraron a ser elegantes komo las otras nasyones evropeas, ma ke se sintiyan
diferentes de punta de vista del kulto. Esto amostra la mentalidad de los djudyos portugezes de mirar de enfrente i no aserkarsen a los ashkenazis del este del payis.
Byen entendido, los djudyos nunka fueron achetados komo dirijentes de la sivdad ni ser myembros de sus korporasyones. Erev de la revolusyon franseza la briyante ‘nasyon djudia portugeza’ de Bordeaux no se asemeja del todo a las otras komunidades del payis.
Los djudyos de Bayonne
Bayonne, sivdad situada mas al sud de Bordeaux, fue morada desde el anyo 1597 por los djudyos portugezes ke ampesaron a establesersen kon el tyempo. En realidad los mas de eyos pensavan
estableserse en Bordeaux, ma la komunidad djudia no los kijo del espanto ke los dasyos ivan a pujar muncho kon la vinida de estos refujyados. Ansi una otra komunidad se formo en Bayonne ke los
acheto kontra dasyos muy pezgados. Verso la mitad del siglo 18 avia en Bourg-Saint-Esprit kaji 3500 djudyos. Estos djudyos portugezes al model de Bordeaux establesyeron una organizasyon semejante a ‘la Sedaka’ ke la yamaron ‘Hebera’. Erev de la revolusyon franseza eyos devian komo komunidad mas de 12 mil liras a las otoridades lokalas, ke sin razon para forsarlos a ke pagen, los impidyeron a
desveloparsen ekonomikamente. Ademas en el anyo 1762 la administrasyon de la sivdad keria ekskluirlos del komersyo de la chikolata por la kuala se avian espesyalizado i ke era un komersyo
muy prospero. Byen entendido los avokatos de los djudyos se yevaron el kavzo fin el deredor del rey para demandarle piadad, koza ke fue achetada en no trokando sus statutos.
Durante la revolusyon, los djudyos de esta sivdad de punta de vista de sus influensa, no eran al nivel de los de Bordeaux, porke eyos no eran tanto poderozos komo sus korelijyonaryos de la sivdad vizina.
Malgrado esto, avia famiyas rikas komo los de Nounes, los de Castro i los de Mendes-France. En el anyo 1785 se remarko ke munchos de los djudyos avian abandonado Bayonne i su deredor, por diversas razones i lo ke avia kedado eran solo 2500 personas.
Los djudyos del Papa
Durante la persekusyon del rey Phillipe ‘el ermozo’, los djudyos del sud de Fransya se avian refujyado en las sivdades komo Avignon, Carpentras, Cavaillon i L’Isle. Malgrado la inimistad de Roma los
dirijentes de estos lugares, a kondisyon de estar enserrados en syertas maales i poder salir ahuera ke solo durante el diya, permetyeron a los djudyos refujyados de aresentarsen. Una grande
povredad i mizerya reynava en estos getos, onde era defendido la entrada a otros djudyos vinyendo de otras partes del payis. Los djudyos fueron muy maltratados durante el siglo 18. Devian ser kuvridos kon chapeos amariyos o tener una marka amariya en sus vistimyentas. Les era defendido de lavorar ahuera del geto el dia de alhad i de tener servidores kristyanos. Les era defendido de vender
ropas muevas, todo modo de komanya o azer el komersyo de kavayos. No podian ser patrones de tyerras i de edifisyos ma solo de sus moradas. Dar dinero en emprestado a los kazalinos les era
permetido ma kontrolado rigorozamente.
Erev de la revolusyon a lo ke dizen syertos investigadores de akel peryodo la povlasyon djudia no depasava las 3 mil almas. Los djudyos del papa para poder pagar los dasyos miravan mizmo a
emprestarse dinero, la razon por la kuala eran muy byen organizados i dirijados por konsilyos ke nomavan un responsable ke yamavan ‘baylons’. El arekojia las taksas de los myembros de la
komunidad, kontrolava el ensenyamyento de la relijyon i su praktika i se okupava de apiadar a los povres. En el peryodo de los anyos 1770 a 1780 los otoktones, malgrado la eglisya, se izyeron mas
ospitalyeros, permetyeron a ke los djudyos entren en syertos kafes, i kombidados a bodas vijitaron sinagogas. Pokos djudyos, malgrado todo, fueron achetados a ser myembros de las lodjas masonikas.
Los djudyos de Paris
La povlasyon djudia de Paris nunka fue muy importante porke desde del dekreto de 1394, data a la kuala los djudyos fueron kondanados a ser ekspulsados, Paris les era ofisyalmente defendido.
Anyos despues los sefaradis fueron los primeros a establersen durante el reynado de Louis XIV, el kual avia dado el derecho a unos kuantos de eyos a ke les sea permetido de bivir en la kapitala. Erev
de la revolusyon en el anyo 1789 avian apenas 500 djudyos, sefaradis i ashkenazis. El foburgo de Saint-Germain-des-Prés fue el lugar onde bivian los djudyos portugezes byen entegrados en la
sosyedad lokala. El sinyor Jacob Rodrigue Pereire enkavesando la chika komunidad, se okupava de sus enteresos al lado de las otoridades de Paris. El fue kapache de tomar la permisyon del rey
Louis XVI en el anyo 1780 para estableser el primer simeteryo sefaradi djudyo a la Villette.
El amaneser
Se ve ke verso la fin de este vyejo rejim kompleksado, los djudyos, komo la povlasyon kristyana, estavan buyendo kontra el, el kual avia sido establesido siglos antes i ke nunka avia trokado. El
desvelopamyento ekonomiko, los trokamyentos en las mentalidades inspiradas sovre las muevas doktrinas del ‘Siglo de las Luzes’ de los filozofos djudyos de Evropa i las relasyones desvelopadas kon el mundo kristyano azen naser entre los djudyos portugezes la voluntad de eskabuirse del rejim arkaiko ke los tenia en un statuto de menospresyo i de inferyoridad. Los djudyos de Bordeaux no kijeron mas ke los prensipyos de la ‘Ley Preta’ de 1685 les sea aplikada defendyendoles de establesersen en las izlas Antilas, de poder merkar plantasyones i posedar esklavos pretos.
Eyos en los primeros tyempos de la revolusyon, despasensyados, miraron a traverso las bozes de sus myembros dinamikos I importantes a ke una fin favoravle i radikala les sea topada. Byen
entendido esto no dependia solo de eyos ma de la majorita kristyana en la kuala se topavan.
El antidjudaizmo tradisyonal egzistente, el, no estava para despareser. Los djudyos eran apuntados komo ingratos, infieles i krueles. A esta pasyon imajinarya se deve adjustar las konsiderasyones ekonomikas negativas. El ministro Malesherbes adresandose kon melankolia al rey le avia dicho: “Egziste dainda en los korasones de los kristyanos un aborresimyento muy fuerte kontra la nasyon djudia”. El avia mizmo konsejado a ke se krea una sivdad eksklusiva djudia semejante a la manera a la de Saint-Jeande-Luz, serka de la frontyera espanyola para el desvelopamyento del komersyo, en la kuala avia pretendido, ke los djudyos se ivan establesersen kon plazer, byen entendido en pagando dasyos altos. Koza ke kedo letra muerta, komo se dize en fransez.
Durante la Asamblea, Malesherbes, analizando politikamente el estado de los djudyos, avia afirmado ke eyos nunka se asimilaran a la sosyedad franseza, i ke van a kedar por syempre komo un estado
aryento de un estado, imperium in imperio, atados a los otros djudyos de otros payizes. Los dirijentes djudyos de Bordeaux vyendo esta situasyon ke los metia en estrechura, mandaron 2 deputados a Paris para dar a entender ke eyos eran byen integrados i diferentes de los ashkenazis i ke se sintian fransezes. Eyos en un raporto ke sumetyeron a syertos deputados influentes, avian eskrito ke los djudyos portugezes en kualker payis onde biven se konsideran sivdadinos de akel payis. El portugez djudyo es fransez en Fransya, inglez en ingletyerra, ma ke un ashkenazi keda syempre aleman, no importa los lugares onde bive.
El buto de los bordolezes era presizo, negosyar a la kayades para obtener para todos los djudyos los derechos del ‘dekreto de tolerensya’ akordado por la Asamblea a los ke no eran katolikos, ma
sovretodo poder konservar el statuto partikolar de sus komunidad. Sus dirijentes en achetando las reformas ke les seran aplikadas, kerian mantener las institusyones egzistentes para sovreguadrar el
djudaizmo i sus poderes personales sovre la komunidad. Ademas para poder protejarse del arivo masivo en Bordeaux de estos ashkenazis alemanes, demandaron a ke dingun djudyo no pueda
aresentarse en kualker sivdad del payis sin la otorizasyon de su komunidad djudia. Demanda ke fue refuzada. Por unanimidad todos los djudyos durante la Asamblea, en sus mayoria, achetavan
la emansipasyon, ma refuzavan la integrasyon. De punta de vista de la djustisya, ni los djudyos portugezes ni los djudyos alemanes bivyendo en Fransya desde jenerasyones, no podían ser mas
kualifikados sovre sus orijines por la nasyonalidad franseza a la kuala tenían derecho.
De sus partes, los inimigos de dar derechos a los djudyos no se kedavan de impedir las seanses ni de azer deklarasyones antisemitas. Voltaire avia dicho ke el puevlo djudyo es el mas odyozo del mundo, malgrado ke el se avia deklarado el shampyon de la toleransya. Komo se entyende, su toleransya no keria dizir libertad i mizmo igualidad. Portanto Rousseau omenaje el puevlo djudyo por el kual se apiada vyendo sus sufriensas i por ser menospresyado en el mundo. El adjusta ke Atena, Sparta i Roma se depedryeron i no desharon desendyentes – Sion fue vensido ma no pedryo los suyos. Todo esto, grasyas a sus karakteristikas, a sus leyes, a sus kostumbres i a sus patriotizmo kuando todo paresia pedrido.
Las eleksyones
En la mizma epoka en Alemanya un fonksyonaryo prusyano, Christian Wilhelm Dohm, publisisto renomado i profesor de finansas, izo un verdadero inventaryo del estado de los djudyos de Evropa. El da a entender los profitos importantes ke la Ingletyerra i la Olanda izyeron en aresivyendo los djudyos sefaradis aronjados de Espanya i del Portugal. Dohm no kere ke los getos egzisten mas, ke
se de a los djudyos la libertad de establesersen onde keren i de pratikar todo modo de aktividad ke les gustara. Byen entendido la pratika del kulto sera totalmente libera. La sola koza ke Dohm
defendyo a los djudyos, mizmo temporalmente, era ke no devian ser ofisyales de estado. Este personaje importante kon sus ideas ayudo a ke los intelektuales fransezes elejidos a la Asamblea se okupen del kavzo de los djudyos, porke en jeneral, los deputados no se enteresavan del todo en esta kestyon, i kada vez ke el statuto de los djudyos se eskrivia al orden del dia, los antisemitos miravan de
raportarlo a mas tadre, a otras sesyones.
Antes i durante el peryodo de la revolusyon, el papaz Gregoire fue en la Asamblea el shampyon de los derechos de los djudyos. Alto, karizmatiko, aedado de los kuarenta, avia deskuvyerto en su
provinsya la mizerya de los djudyos de Luneville. El eskrivyo artikolos a este sujeto i se okupo a obtener permesos para alivyanar los pezgos sosyales i administrativos de los djudyos. Konosia byen
las ovras de Mendelssohn i de Dohm. Syendo nominado deputado, el se sintia i diskorsava en el anyo 1788 komo los futuros republikanos de 1793. Gregoire, todo en sostenyendo la libertad relijyoza, su neder era a ke los djudyos kon el tyempo agan parte de la relijyon dominante de Fransya.
Kon el ayudo del papaz Gregoire, el deputado Mirabeau, el konde Clermont-Tonnerre, Adrien Du Port, el duke de la Rochefoucauld, el markiz de Condorcet i mas myembros reales elejidos a la
Asamblea de Los Estados Jenerales ke se inoguro por el rey a Versailles el 5 marso 1789, ‘la nasyon djudia portugeza’ resivyo del governo real el derecho a ke sus myembros sean elejidos sin
diferensya de los kristyanos. Koza ke fue diferente para los ashkenazis, los kualos no fueron konvokados a las asambleas de votasyon, desizyon radikala ke marka la diferensya entre los
djudyos del sud-oeste i los del este. Ma mas tadre kon el apoyo del governo royal la situasyon troko i los djudyos del este pudyeron mandar sus propyos delegados.
Las 303 demandas ke avian prezentado los djudyos a la Asamblea ande la totalidad proveniya de los del este, no avian enteresado del todo los fransezes. Ademas el total de las demandas syendo mas de
40 mil, las propabilidades de las demandas de los djudyos a ser diskutadas eran pokas. Por lo mas eyos reklamavan la anulasyon de todos los dasyos i taksas ke se aplikavan a los djudyos.
Los debates
La Asamblea durante 3 mezes despues de aver diskutido los derechos del sivdadino i diferentes aspektos de las libertades individualas, en el mez de agosto voto el dekreto ke avia destruido
el orden sosyal del vyejo rejim, en suprimyendo sus privilejyos. Sovre todo la ‘Deklarasyon de los derechos del ombre’, votado entre el 20 i 26 agosto avia proklamado ke los ombres nasen i kedan
liberos, iguales enfrente del derecho el kual garantiza la libertad de las opinyones, mizmo relijyozas. El sorte de los djudyos de Fransya fue ansina reglado. Los sefaradis, en sus estados briyantes, enfrente de esta mueva situasyon, no se avian sintido muy alegres porke el statuto muevo de los desmazalados ashkenazis avia kreado en eyos mirikias en kreando espanto de afrontar problemes sosyoekonomikos ke no se asperavan. En despartes no les avia plazido del todo las reaksyones de los de Paris, ke refuzaron sus politika de kayades, i ke se adjuntaron a los revolusyonaryos i a ser volontaryos en la defensa nasyonal. Los djudyos de Paris sefaradis i ashkenazis se avian adjuntados para formar un solo grupo sensivle a la revolusyon, simbolikamente demonstrando sus kolor politika.
Malgrado esto en la Asamblea uvo munchas diskusyones sovre los djudyos, si veramente tenian derecho de ser fransezes i tener los privilejyos de sivdadino. Poko mezes despues de la Deklarasyon de los Derechos de Ombre, la mizma Asamblea mirava a no dar todos los benefisyos del sivdadino a los djudyos i a los ombres de kolor. La fuersa de los prejudisyos era muncho mas grande ke la de los
prinsipyos de igualidad. El antidjudaizmo de la eglisya, tradisyonalmente inimiga, avia kreado raizes profondos en la memorya de todos los fransezes i la figura kolektiva del djudyo uzurero bastava para ke el djudyo sea konsiderado komo etranjero a la sosyedad kristyana. A esto Clermont-Tonnerre ajusto: “kale refuzar todo a los djudyos komo nasyon i darles todo komo individuos. Eyos no devran ser un puerpo politiko ni un grupo, ma ser sivdadinos individuales.” Esto fue i kontinua a ser la doktrina de la asimilasyon en Evropa.
Una vez el dekreto del 24 desembre 1789 publikado, la delegasyon de los djudyos bordolezes se torna de Paris kon las manos vazias. A kavza del dekreto i por modo de la stratejia yerrada sovre las
demandas yena de bavajadas de los djudyos ashkenazis del este, durante los debates de la Asamblea, eyos ke avian sidos achetados komo sivdadinos pedryeron este statuto. Un verdadero dezastro,
visto ke el dekreto no avia echo dinguna diferensya entre los djudyos del sud-este i los del este en no rekonosyendo el derecho ofisyal de sivdadino a dingunos de eyos. Ansi, los del sud, salyendo pedridos i sovre sus grandes deskontentes, sus shefe Dias Pereira manda a los djudyos de Alsace una letra de keshida, en akuzandolos dizyendo, achakes de vozotros, los de Bordeaux, sin mizmo poder obtener muevos derechos, pedryeron los ke tenian. Poko despues las partidas avian tomado la desizyon de espartirsen durante los debates, todo en kedando en kontakto. Ansi kada una era por si i el Dyo bindicho para todos…
Sovre esto un bloko sefaradi se avia formado entre los djudyos portugezes de Bourg-Sain-Esprit, Bordeaux, Marsilya, Lyon i Paris, para mijor defendersen en la Asamblea i no estar mas endjuntos kon
lo ashkenazis, ke no eran muy byen vistos en Alsace. Los ashkenazis finalmente entendyeron la situasyon de sus ermanos del sud, ma malgrado esto insistyeron ke la lucha devia ser echa para todos los djudyos de Fransya. Poko emportava si las stratejias de las dos partes no eran del todo las mizmas.
Durante los debates ke kontinuavan, los deputados antisemitos, syempre ke vinia la kestyon de la nasyonalidad de los djudyos, miravan a ke no se debate. En la sesyon del 28 enero 1790 Talleyrand avia avyerto el debate al nombre del Komite de la Konstitusyon, onde se diskutyo el statuto de los djudyos en la kuala avia deklarado ke los del sud-oeste tenían el derecho de ser achetados a la nasyonalidad franseza visto ke eyos inchian todas las ovligasyones de sivdadino, pagando los dasyos i partisipando a las milisyas nasyonalas. Sovre esto la Asamblea se enflamo, el debate turo dia entero ma finalmente se eskapo kon la viktorya de los del sud. Kon 374 bozes kontra 224, la Asamblea dekreto ke todos los djudyos konosidos komo portugezes, espanyoles i avinyonezes, kontinuaran a gozar de los derechos ke resivyeron fin agora i en konsekuensa se les da el derecho de ser ‘sivdadinos aktivos’. No paso diyas, los de Paris, grasyas a sus altas relasyones fueron kapaches de konvenser los myembros de la ‘Komuna’ de la sivdad, la kuala demando konfirmasyon a la Asamblea por sus djudyos si poden ser sivdadinos aktivos, koza ke les fue konfirmado. Por kontra se vido una grande tristeza i deziluzyon entre los djudyos ashkenazis ke fueron ovligados de kontinuar a luchar en la Asamblea por sus derechos.
Para konkluir, dire ke los djudyos sefaradis de akeya epoka fueron kontentes de no ser mas vistos inferyores en la sosyedad franseza, ma ke en sus konsensyas les avia kedado la yaga moral de los
ombres de kolor i de los esklavos afrikanos ke no avian resivido los mizmos derechos, sino solo un siglo mas tadre.
Dr. Selim Yeoshua Salti
