The Yehoshua Salti Foundation קרן יהושע סלטי
For the flourishment of Ladino and creating the leaders of tomorrow
להבטיח עתיד ללאדינו ולהצמיח דור חדש של מנהיגים
Kualo es el Ladino? לאדינו מהי
El Djudeo-Espanyol, konosido mas komo "Ladino" es la lingua de los Djudios ke fueron ekspulsados de Espanya, en 1492, i ke se aresentaron en el Imperio Otomano, en el Norte de Afrika i mas tadre en la Evropa Oksidentala i los Estados Unidos.
Durante sienes de anyos, los Sefaradis mentuvieron la lingua Espanyola, todo en mesklandola kon palavras i lokusiones de otras linguas i kulturas, ke djuntos kon el Ebreo krearon una lingua Djudia espesiala, rika i diferente en kreasiones literiarias.
El Ladino – lingua de jenerasiones i lingua para jenerasiones.
Bienvenidos a la Fundasiyon Salti
La Fundasion Salti fue kreada afin de apuyar un mijor futuro a los djovenes en Israel i darles un apoyo ekonomiko kon el buto de enkorajarlos afin ke puedan kontinuar en sus estudios en las institusiones akademikas.
Desde su fundasion en 1983, la Fundasion Salti ya realizo el buto de su fondador, el Dr. Yeoshua Salti, de mentener bivo el Ladino, i tambien de sovreguadrar la kultura i el patrimonio djudeo-espanyol.
La Fundasion ya distribuyo asta oy en dia, a sienes de estudiantes bekas kon sumas de ₪2,000 a ₪8,000 al anyo, enkorajandolos de esta manera a kontinuar en sus estudios ansi ke de someter mas demandas para bekas adisionalas.
Entre sus aktividades numerozas, esta Fundasion apoya el "Instituto Salti para el Estudio del Ladino" desde su inaugurasion en 2003, i ke se topa en el Departamento de Literatura del Puevlo de Israel, en la Universidad Bar Ilan. El Instituto propoza al grande publiko ke se interesa a estudiar el ladino aktividades en el kampo de la investigasion i del ensenyamiento ke estan yevando adelantre el idioma i su kultura verso un muevo futuro. El Instituto Salti da sus ospisios a investigadores Israelis ansi ke a djente de diversas partes del mundo, i a muevas jenerasiones ke tienen intereso, la posibilidad de kontribuyir kon sus medios a la investigasion del ladino i su kultura.
Las muevas aplikasyones para las bekas ampesaran el 1.1.2023.
Los datos en el formulario deven ser eskritos por medio de komputadora i no eskritos de mano.
Los formularios ke no inkluiran todos los datos demandados no seran tomados en konsiderasyon.
Los formularios adekuados seran egzaminados por el Konsilyo de la Fundasion Salti.
Los kandidatos ke seran topados adekuados seran konvokados a una entrevista personala, en el dia i la data ke seran fiksados de antes.
En el dia fiksado, la prezensia de los estudiantes konvokados para sus entrevistas es obligatoria i parte del proseso de egzaminasyon.
Toda deklarasion sovre el estado familial/de salud/personal/ o otro – deve ser apoyado kon dokumentos adekuados.
El formulario i todo otro dokumento aneksado no seran retornados i no seran guadrados.
Los formularios deven ser embiados al sigyente adreso elektroniko: info@saltifoundation.org o por medio de fax: 09-8657381, solamente por medio de korreo elektroniko o por medio de faks.
Todo formulario ke sera embiado por posta regular o otro medio no sera akseptado.
Para pueder resivir las bekas, los kandidatos ke fueron aprovados seran konvokados a estar obligatoryamente prezentes en la seremonia de la distribusion.
Es muy posible ke datos de los kandidatos ansi ke fotografias ke fueron tomadas durante la seremonia apareseran en el sitio del Internet de la Fundasion, i es posible ke se puedan uzar en sus diversas publikasiones.
El kandidato ke resivira una beka, devra mensionar en kualker de sus ovras komo referensiya el ayudo ke resivyo de la Fundasion Salti.
En su demanda, el kandidato deve deklarar ke todos los datos i dokumentos sometidos son djustos i egzaktos; ke la Fundasion Salti es el uniko ke puede desidir a este sujeto; i ke meldo i aksepto todas las kondisyones del formulario para resivir una beka.
Por razones linguistikas, aun ke el teksto del formulario esta eskrito en forma maskulina, el se adresa a todos los seksos.
REZUME DE LAS KONDISIONES:
Estudiantes de B.A.
Prezentar dokumentos de aprovasion para los estudios de B.A. ke permeteran de empesar en el anyo akademiko futuro, despues ke la demanda fue sometida.
Se nesesita del kandidado el program de estudios kompletos. Elevos devran tener un promedio de 82 puntos i mas, a la fin del primer anyo de estudios.
Los elevos no deven de depasar la edad de 28 anyos al envio de la demanda.
Estudiantes de M.A.
Prezentar la aprovasion universitarya ke ya fue resivida a los estudios de M.A., en el anyo akademiko de despues ke fue sometida la demanda.
Prezentar la propozision de investigasion para la teza ke fue aprovada por el komite para los estudios de M.A., en la institusion de la kuala depende.
El elevo devra tener un promedio de 86 puntos.
Prezentar a la Fundasyon Salti una kopia de su teza kuando sera kompletada.
Los elevos no deven de depasar la edad de 32 anyos al envio de la demanda.
Estudiantes de doktorado
Prezentar konfirmasion ke fueron akseptados a estudios de doktorado ke empesaran al anyo ke viene despues ke fue sometida la demanda.
Prezentar una propozision de estudio para doktorado ke fue aprovada por el komite para doktorado en la institusion onde estudia.
Prezentar a la Fundasyon Salti una kopia del doktorado kuando sera kompletado.
Los estudiantes no devran depasar la edad de 40 anyos al envio de la demanda.
La demanda de kandidatos de mas de 40 anyos podra ser egzaminada kavzo par kavzo.
Kondisiones adisionalas i mas informasiones sovre la bekas:
Las bekas son destinadas a estudiantes de preferensiya de orijin sefaradi ke tienen atadijo al mundo kultural-linguistiko de los ladinoavlantes en la Diaspora i de paizes onde se avla ladino como Turkiya, Bulgaria, Gresia i la eks-Yugoslavia.
Prioridad sera dada en baza de la situasion sosio-ekonomika a los kandidados sin apoyo materyal, i ke no resivyeron otras bekas.
Prioridad sera dada a estudiantes ke kontinuan en estudios mas avansados.
Estudiantes ke ya resivieron en el pasado una beka de la Fundasion pueden prezentar demanda para resivir tambien una otra, en los anyos sigyentes.
Las bekas seran dadas en todos los kampos de estudio de las institusiones universitarias i de altas eskolas de Israel.
Estudiantes en sus ultimo anyo de studio, ke no resivieron ainda una konfirmasion por la kontinuasion de sus estudios, no puedran someter una demanda de beka.
Antes de presentar la demanda, asigurarse ke todos los dokumentos demandados seran prontos. Si no, la demanda puedra ser refuzada.
Inkluir fotokopia de la karta de identidad (inkluzo el "sefah") i las notas resividas asta la data de prezentasion de la demanda.
Adjuntar fotografia aktuala a la demanda.
Dokumento sovre las dos ultimas mezadas.
CV
Letra de introduksiyon para la demanda no es ovligatoria, ma rekomendada.
El kandidato puedra sometir todo modo de dokumento adisyonal ke apoya su demanda.